Tho la eng rawh Hringnun hi a ngaiin a kal reng ngai lova; nitin mai hian thil

Tho la eng rawh Hringnun hi a ngaiin a kal reng ngai lova; nitin mai hian thil thar kan hmachhawn thin a ni. Mihring nuna thil ngai kan tawn zin ber chu kan la tawn ngailoh thil kan tawn hi a ni awm e. Harsat-manganna leh hlimna inkarah hringnun hi chu kan hmang ral mai thin a ni. Harsatna tawk lo mihring kan awm ngailo,harsatna leh mangana namen loh kan tawh chang te leh beidawng em em hmalam huna beiseina reng reng kan neihloh hun kan tawn chang te hian kan thupui “tho la eng rawh “tih hi a pawimawh hle a ni: Mahse heng hunah tak hian tho tura chakna neih erawh a va har si em!!tho tur kan nih leh insiamrem a tul tih hre reng chung si pawh hian thil harsa tak zawng a ni e. Ringtu nunah hian heihi thil thleng fo thin a ni reng a ni. Ringtu ngaia awm reng chu ringtu nunglo an ni fo thin. Tuipui thi (dead sea ) a tui luang lut reng reng khu chhuahna a awm lo a, a ngaiin a awm reng thin, khumi avang khuan nungcha engmah a awm theilo heihi ringtu te tana kan inenfiahna tur pawimawh tak a ni. Ringtu ngai reng, lungchhuak lo te nunah hian miten eitur an hmu ngailo a ni. Pa pakhat hi lungngai tih hriat tak hian kawng sirah a lo thu ngui bur a, enge a chhan an han zawh chuan ani chuan “ka hun lo la awm tur avang hian ka lungngai em a ni “a ti e. an ti a. Engvanga a hun lo la awm tura lungngai nge a nih tia an han zawh leh chuan anni chuan tihian a chang a”ka hun kal tawh te avangin” a ti mauh mai e an ti a; thil khawlhkham tak mahse dik fu si a ni tlat a ni. Ni e, hringnunah hian hetiang anga mahni lo awm khawloh tawh avanga beidawng a rum mek, nun khawhar, kohhran leh khawtkang ina an endawng tawh, mahni chhungte(nu leh pa, U leh nau te) ngei pawh ina an tuithlar hial te pawh an ni thei e. Hetiang beidawng arum mek te hian an nun hlui kalsana hi an duh thin mahse sual beihna avangin nun ning takin an nun ngaiah an awm reng thin. Setana hian an ngaihtuahna fim pawh hmang theilo a, a bawh bep tlat hi chu an va lainatawm tak em! hmasawn a engchhuak tur hian thinglung dik mahni dinhmun ngai kalsan duhna thinlung kan nei phawt hi thil tur hmasa ber a ni.Heihi kohhrana rawngbawlna kang hrang hrang chelh mek te tan hian tul tak zet a ni. Rawngbawlna kawngah te pawh hian hmasawn kan duh thin mahse kan awmhmun ngai kalsan kan hreh avang hian hma pawh kan sawn theilo fo thin reng ani. Tute mai pawh hian kan awmhmun ngai (comfort zone) kal pelh hi kan thil hreh ber niin a lang mahse engchhuak tur erawh chuan a pawimah si. Chuvang chuan rilru dik tak pu chunga ke pen ngam hi a va pawimawh em. Rawng bawlna kawng hrang hrang ah ke kan pen thin heihi thil tha tak a ni amaherawh chu kan innghahna hi kan chiang tur a ni.Pathianah kan innghat tlat tur a ni. Pathiana innghat tlat ringtu chu atirah langsar el ual lo mahse arei telh telh a, a eng hliah rual a ni lo.Pathian rinchhan tlat nun chuan harsatna leh mangana vawrtawp a kan ngaih a tawh chang pawhin eng kawng emaw talin Pathian puihna in a eng chhuak leh nge nge thin. Engpawh tiin engpawh thawk ila Pathian a innghat tlat ringtu ni ila eng hunah pawh kan nun chu mite mithmuhah a lo eng mai dawn a ni. Pathianin a duh taka a siam kan ni a, a ropuina puang chhuak tur, khawvel mite hma eng tur kan ni tih hi a tharin I hre nawn leh ang u.Pathian rinchhan tlatna hi nun kawng sual lo dai tawh te tan hlei hlei hian a tul a ni, setana awp behna hi Pathian chakna nen lo chuan hneh zawh rual a ni si lo. “Khawvel eng in ni e. Tlang chhipa khaw awm chu thuhruk theih ani lo. Miin khawnvar halin hrai hnuaiah an dah ngailo, a dahnaah an dah zawk thin:tichuan in chhunga mi zawng zawng a en thin. Chutiang bawkin in eng chu mi mithmuhin eng rawh se, chutichuan in thil tih thatte an hmu ang , in Pa vana mi an chawimawi thei ang.” Matthaia 5:14-16. He bible chang hi kan nun pum innghahna ni se a va duhawm em!! Kohhran a kan rawngbawlna hrang hrang ah te, khawtlanga kan theih tawka kan thawh ve na ah te leh chhungkua a mawhphurna hrang hrang kan neih ah te hian he bible chang hi rilru a vawng reng ila a tha hle ang. Chuvangin eng ang mi pawh ni la, sual avanga nun beidawng tawh emaw, hmasawn tuma rawngbawl thin mahse hmasawn thei silo emaw mahni chhungte ngei pawhin a an rin zawh tawh loh khawpa nun kawng lo dai sual tawh pawh lo ni mah la, Isua Krista ringin tho la eng rawh. Misual mahni a in chhandam thei tawhlo te tanna a nun hlan tu a nih angin nangpawh I dinhmun chhe taka atanga tho a eng turin Isuan a duh che ani. Isua krista ringin tho la eng ta che. .